عضوية مميزة
تاريخ التسجيل: Dec 2010
الدولة: سوريا /حمص
المشاركات: 5,510
شكراً: 18,885
تم شكره 22,038 مرة في 4,797 مشاركة
رد: يوميات لقمان في حمص
...........يومية لقمان في حلب ...........
........النزوح و التشرد الثاني في الوطن......
على بساطة البيت الثاني الذي أسسته في مدينة حلب بعون من الله عز و جل .....ومؤازرة بعض أصدقائي المخلصين ................
على بساطة البيت و بؤس الأساس و الفرش اللذي فيه مقارنة مع بيتي في حمص ....
الا أنني كنت شديد الفرح به و اعتبرته نعمة كبيرة من الله عز و جل خففت وطأة حزني على فقداني لبيتي الأساسي في مدينة حمص....و لففت شمل عائلتي حولي تحت سقفه الواحد ......
الا أن ارادة الله عز وجل و الحمد لله شاءت أن ابتلى في هذه النعمة أيضا ..........
من مساء يوم الأحد الماضي واطلاق النار الكثيف كان يذكرني بأيامي الخوالي في مدينة حمص .....
من أول كام رصاصة نط حكيم و هو خايف ....
فكنا نحن مفهمينو انو هاد الصوت بحلب هو صوت فتيتة يعني فتيشة ..مو متل حمص ...شغل مسلحينات
المهم أول كام رصاصة التلوا هدول فتيتة ...فاقتنع الزلمة مني كيف لكان أنا أبوه ما بحكي الا الصح ....
كام رصاصة تانية فزع الولد و نط و هو عميردد الدرس يلي عمحفظوا يا : فتيتة ..فتيتة ...و شوي تاني راح يبكي .....
بعدين لعلع صوت الرصاص ....
تفرج علي حكيم بنظرو ة حسيتوا عميؤلي يلعن اخت هالفتيتة اي صاير يا بابا متل قناة الدنيا....
كام فتيتة عفوا كام رصاصة تانية رجعت مواهب حكيم يلي كانت بحمص زت حالوا على الأرض منبطحا بدوا يتخبا تحت شي طاولة...و هو عميصيح بابا ...مسلحينات ..بس اخطيطوا ما ظبطت معوا مظبوط لأنو للأسف ما في طاولة يتخبا تحتا !!!
المهم ...ضميتوا لحكيم و حاولت هددء من روعوا و رحت عطيطوا يا لأمو...و طلعت على البرندا بدي اعرف شو عميصير ....
تفرجت يمين و شمال ما شفت شي ...
سمعت هيك صوت هدير من السما تفرجت ...فاذا بطائرتي هليوكبتر عمتطوف بالسما و نازلة ضرب بالرشيش تبعا .....
حاولت كذب عيوني و فركتون ....
اي ضلت الطيارات حاولت اضحك على حالي و ما صدق انو هاد طيران و عميضرب ما بدي ارجع للتشرد و لحالة الخوف من انو يطربق البيت على صحابوا ...
ازداد القصف ضراوة .....صارت الطيارات فجأة هيك تنحني للأسفل و تهجم متل النمر و طوب تضربلا شي صاروخين و ترجع تطلع...و بعد شوي نسمع صوت الانفجارات يلي كانت ترج البيت ........
كان الجيش الحر مستولي على ثكنة عسكرية جانب دوار الجزماتي و منتشرين بالشعار و قاضي عسكر و باب الحديد ........و كانت الطيارات عمتضرب ..
المهم ليلة ما يعلم فيا الا الله سبحانه و تعالى و بلشت العالم تهرب من الحارة و من ضمنون بيت حماي
يلي آلولي أوم طلاع معنا .....
صفنت هيك و الت لحالي اي ما راح اترك هالبيت بهالسهولة ...اي طلعت عيوني بالطول و بالعرض حتى أسستوا صحيح هو اجار بس بيتم اسموا بيت مآوينا ....
ضليت هيك لليوم التاني و ابني حكيم عميتفرج فيي و يؤول فتيتة مو ...هاد صوت رشاش خمسمية ...و هاد صوت رشاش أربطعش و نص و هاد بي كي سي و هاد صوت صاروخ طيارة هليوكبتر ...و هاد ...و هاد ....
ما شاء الله عنوا هاد الجيل شو فتح ......
المهم ليلة التنين صار القصف لا يحتمل و بالفعل خفت ما ينهدم البيت فوء روسنا ...طلعت على البرندا و الا العالم كلياتا عمتهرب .....بالسيارات بالشاحنات بالسوزوكيات... النسوان و الولاد معباية الصندوق و يا دوب السيارة عمتمشي
النسوان و الولاد بسيارات الشحن وبالسيارات العادية و حتى بصندوق الأمتعة حاطيين الولاد ....الناس بالشوارع شايلين الولاد و الشناتي و راكضين ......
منظر نزوح و تشرد مؤلم و يقطع القلب و خاصة انه برمضان
....صرت روح و اجي هيك بالبيت و العرء عميتصبب مني شو بدي ساوي ....اي بحمص انا بعرف الحواير و بعرف الناس و بعرف كيف بدي امشي ...هون شوبدي ساوي .....ندهتلي أم حكيم مشان اتسحر ...
طبعا ما راح أؤولكون أنو ما تسحرت و ما الي نفس ...الكذاب ملعون ...بالعكس أكلت و فشيت خلئي بالأكل على وقع أصوات الانفجارات ووقع أصوات بكاء الأطفال و صوت النساء و الرجال النازحين في الشارع .....
خلصت سحور و طلعت على البرندا .......
ازداد خوفي ..ما من القصف ..ازداد خوفي انوا ما ضل حدن بالحارة ...و صارت الحارة حارة أشباح ..
تفرجت هيك على الطيارة ...و شو تمنيت وأتا أأدر صيبا بالعين و توقع ...باعتبار ما عندي شي أأدر فيو أتحاشى بلاها لهاطيارة ....
صرت أؤول ايه شو هالصوت ...اييه شو هالضو يلي عميطلع منها ...ايه شو هالقصف ....
انو كنت صيبا بالعين ..عبس ما كانت توأع هالمحروئة عفوا هالحاروئة ...ما كانت توأع ...
المهم التلا يا الله يا ام حكيم انتي عاملة دورة بحمص عن طرق الاخلاء السريع ...يا الله يا حبيتي ضبي الغراض لنشوف شلون بدنا نهرب و ننزح و نتشرد مرة تانية بهالوطن ....
آلتلي لبس الولاد ...التلا لكان و عمليلون سيشوار كمان و عطريون .....لأنو رايحيين سيران نحنا مو ..
ضبي هالغراض و لنشوف شلون بدنا نفركا ....
ضبيت أم حكيم الغراض ...و صلينا الصبح يلي كان لها أثر كبير في تهدئتنا و نزلت على الشارع دورر على شي سيارة ...كل السيارات عبيانة ما الك محل تركب أو تدوس فيا ....كلو عميرحل ....
ضلليت شي ساعة و ما أدرت لائي وسيلة نقل ....
آخر الشي يئست لائي سيارة اتصلت بحماي ....
التلوا الوضع هيك بالحارة آم رد علي كام مرة النالك طلاع معنا ...مدري انت شلون بتفكر ....
بصراحة أنا انزعجت منوا ...التلوا شو دخل هي بهي ...هللأ عمأتصل معاك و أنا بحالة اضطرارية
مو وأت تسجيل مواقف هللأ .....
آللي اتصل بعديلك خليه يجي ياخدك بسيارتوا ...
و خبرني شو بيصير معاك .....
التلوا طيب و سكرت الموبايل و أنا مزعوج منو و ما اتصلت بعديلي .....و رجعت دور على سيارة و ما لائيت ...و رجعت على البيت
بعد شوي رجع اتصل حماي.....ما رديت عليه و عطيطا الموبايل لأم حكيم ...آم خبرها انو بعد شي ساعة راح يجي عديلي و ياخدنا بالسيارة .....
وأفت هيك على البرندا و أنا صفنان هيك شلون ألبت و فتلت حياتي فوئاني تحتاني .....
و تفرجت على العالم شلون عمتهرب ....و الت لحالي الحمد لله رب العالمين ...ما فينا غير نؤول هيك
فرب العالمين هو مالك الملك يؤت الملك من يشاء و يعز من يشاء و يذل من يشاء بيده الخير و هو على كل شيئ قدير .....
و بعد فترة نزلنا الغراض الضرورية لباب البناية
و سكرت الباب اجا عديلي و النوم بعينوا ...و الله استحيت منو بس عاد شو بدنا نساوي الله يصطفل بيلي كان السبب ..الله يصطفل بيلي ألب حياة السوريين رأسا على عقب .....يلي شرد الناس ..يلي أفقد الناس الأمان ...يلي أفقدنا متعة الصوم و العبادة في رمضان ....طلعنا باليسيارة و الولاد نص نايمين
و مشيت السيارة رجعت تفرجت هيك على البيت للأمانة زعلت بس بالحقيقة ما كان متل الزعل يلي زعلتوا وأت كنت عمأترك بيتي بحمص ...مشيت السيارة و الآلاف بدون مبالغة من الناس يلي ما صحلون مركوب في الشوارع تنزح مشردة هائمة على وجهها ....مرينا بين المسلحين يلي عاملين حواجز بالطريق ...عند قاضي عسكر و باب الحديد و مدخل ميسلون ...و آخر حاجز آللنا ديروا بالكون
الطيران عميقصف ....
هون تبسمت و الت لحالي ....الطيران عميقصف ...و ديروا بالكون يعني شو بدنا نساوي ...آل ديروا بالكون آل ......
و تذكرت وأت كانوا معارفنا بحلب يتصلوا معنا وأت كان القصف شغال بحمص....
و يؤولولنا معؤولة خاي يعني قصف ..قصف ....ما كانوا يصدقوا ....و للأمانة شوية شوام كمانة مو بس الحلبية
سبحان الله ...هالمرة وصل البل لدقنون..و شافوا بعينون و ما حدن آللون
و كانت طيارات الهليوكبتر هي و عمتقصف تنشاف من وسط حلب من ساحة سعد الله الجابري و من شارع الشللالات بالعزيزية ....جهارا نهارا و ليلا ..
هيك على عينك يا تاجر ....على عينك يا تاجر حلب
__________________
أبو حكيم الدين
التعديل الأخير تم بواسطة لقماان ; 27-07-2012 الساعة 12:38 AM